Shakira e Pique bëhen prindër, lind djali i tyre

Data e publiklimit: Friday, December 28th, 2012

Shakira ka lindur, foshnja është një djalë. I dashuri i këngëtares, tepër i gëzuar, ka dhënë lajmin e lindjes nëpërmjet Twitter-it, duke thënë se çifti ishte “tepër i lumtur”. Duke shkruar në spanjisht, ai tha: “Lindi djali ynë! Jemi shumë të gëzuar! Faleminderit të gjithëve për mesazhet tuaja!”

Disa ditë para Krishtlindjes, Shakira kishte publikuar një foto shtatzënë në gjendje tepër të avancuar, teksa kërkonte për dhurata nëpër dyqanet e Barcelonës. Këngëtarja kolumbiane është emëruar së fundi i juristja më e re e edicionit amerikan të “The Voice”, duke zëvendësuar Christina Aguilera-n.

Ky është fëmija i parë i këngëtares, e cila u bë e njohur në skenat muzikore kolumbiane e amerikano latine, në vitet ’90, përpara se të futej fuqishëm mes turmave anglishtfolëse të SHBA-ve. Shakira e bëri të ditur shtatzaninë e saj nga mesi i shtatorit, në faqen e saj personale.

Futbollisti Pique ka konfirmuar së fundi në një intervistë radiofonike, se e dashura e tij nuk po planifikonte ngadalësimin e punëve të saj, madje ajo është duke u përgatitur për publikimin e albumit të saj të ri.

“Albumi do të publikohet pas lindjes së fëmijës, sepse asaj do t’i duhet të shkojë në turne, gjë që nuk mund ta bëjë tani”, tha pak kohë më parë qendërmbrojtësi i Barcelonës. “Dhe… me shumë mundësi do të ketë një këngë në gjuhën katalane, ndoshta mund të titullohet ‘Boig per tu’ (I/E cmendur për ty)”, përfundoi Gerard Pique./SportIndeks.Com

Ky publikim eshte lexuar 1753 here

Fjalët kyçe